Un vídeo realmente cativador, deses que tanto nos gustan aquí en Xogosdelingua. O seu autor, o director e ilustrador neoiorquino Greg Condon, titulouno Disillusionment of 10 Point Font. Un exercicio de creatividade tipográfica feito a partir dunha máquina de escribir Smith Corona Galaxie Deluxe e da técnica do stop motion.
Sink (‘depresión’), lazy (‘preguiceiro’), pin (‘alfinete’), orbit (órbita), happy (‘ledo, feliz’), miss (‘erro’)... Palabras que cobran vida convertidas en fantásticas metáforas visuais, como sucedía naquel tamén xenial Word as Image de Ji Lee. E o son, de One Thousand Birds, que lles dá aínda máis forza. Non perdades detalle!
Poucas veces Batman tivo un inimigo tan estraño e arrevesado. Aquí o temos. Ao descubrir a frase reversible «A but tuba» sobre a parede de ladrillo, o heroe de Gotham decontado imaxina que a pintada só pode ser obra dun supervilán... Palindrome!
O vídeo é un capítulo de Robot Chicken, serie Americana en stop motion caracterizada polo seu humor disparatado e por parodiar personaxes populares dos 80 (DC comics, Star Wars...).
Finalmente, no episodio, Batman consegue sobrepoñerse á arma máis mortífera do seu inimigo: os palindromos. Frases simétricas que o malvado Palindrome solta coma quen asubía, cunha facilidade que deixa abraiado ao propio home morcego.
Aquí tedes o texto íntegro en inglés.
Batman: A but tuba! This looks like the work of... Palindrome: WAS IT A BAT I SAW? Batman: Palindrome! I see you're still talking in sentences that are spelled the same forward and backward. What are you planning?! Palindrome: EVIL I DID DWELL, LEWD DID I LIVE. Batman: Tell me, why do you continue to haunt Gotham, Palindrome? Palindrome: MR. OWL ATE MY METAL WORM. Batman: Mr. Owl? I dont know Mr. Owl... Palindrome: GO HANG A SALAMI, I'M A LASAGNA HOG. Batman: Over my dead body, Palindrome! Palindrome: GOD DAMN MAD DOG! Batman: I should feed you to the dogs! Palindrome: NO SIR, PREFER PRISON! Batman: It's not too late for you Palindrome, you can still do good! Palindrome: DO GOOD? I? NO. EVIL ANON I DELIVER. I MAIM NINE MORE HERO MEN IN SAGINAW. SANITARY SWORD A TUCK CAROL, I! LO, RACK, CUT A DROWSY RAT IN ASWAN. I GAS NINE MORE HERO MEN IN MIAMI. REVILED. I? NO NA, LIVE ON I DO. O’ GOD! Batman: Wow. That was impressive.
Quedoulles a cabeciña decansada aos pobres guionistas!
Como cabeceira da entrada de hoxe... «O moucho chosco», canción do recoñecido audiolibro Tic-Tac, de Pablo Díaz e a súa banda, publicado aló polo 2009. Aquí vai a letra, ideal, por exemplo, para traballar o campo semántico dos animais:
O moucho chosco
Un moucho que é chosco que vive nun souto viu pasar a lebre que a presa te leve.
E nese momento cal se fora o vento pasou un esquío que ninguén viu.
E a donosiña que rápida viña levaba un rato collido do papo.
E unha vaca loura de cor moi moura que alí pasaba e non viu nada.
Non viu o moucho o esquío tampouco nin a donosiña que o rato tiña.
Esto foi nun souto que chovía moito nun día de inverno con néboa e con vento.
Por certo, esta animación seica foi feita, motu proprio, por un seareiro do grupo. Unha fermosa peza en stop motion que nos fai pensar canto se podería chegar a facer no camiño da normalización se, ademais de imaxinación e de vontade, dispuxésemos de máis recursos.
E falando de recursos, aquí deixo a ligazón da Coordinadora de Equipos de Normalización e Dinamización Lingüística de onde tirei a canción. Un arquivo de referencias musicais ben amplo onde atoparmos cancións e videoclips os nosos máis pequenos.
Todas as letras do alfabeto inglés presentadas das formas máis creativas, desde o «A» de anamorphosis ata o «Z» de zero. Xogando con diferentes técnicas e materiais, os deseñadores buscaron aproveitar cada letra para expresar visualmente o significado da propia palabra. E sempre coas proporcións da fonte Helvetica.
Engaiolante! Seguro que, despois de vela, volverás darlle ao play! Un pequeno presente para lle dar a benvida ao 2014! Os mellores desexos para o ano novo!
A primeira obra cinematográfica de Tim Burton foi Vincent (1982), unha deliciosa curtametraxe de animación en stop motion. Nela, o director californiano cóntanos a historia de Vincent Malloy, un neno de 7 anos que, como lle sucedera ao Quixote, comeza a perder o siso por causa das obras de ficción. No caso de Vincent non son novelas de cabaleiría senón historias de terror: as dos relatos de Edgar Allan Poe e as dos filmes protagonizados por Vincent Price.
Así, Vincent Malloy acaba por sucumbir ao poder da súa imaxinación creando un mundo novo no que mestura o plano da realidade (familia, mascotas...) e da fantasía (monstros, arañas, vampiros...).
Na curtametraxe, en branco e negro e cunha coidada estética gótica, a historia é narrada mediante un fermoso poema composto polo propio Tim Burton (aquí vos deixo a peza completa) e coa escura voz en off de Vincent Price en persoa.
Pois ben, hai uns días dei cunha versión desta curtametraxe dobrada ao galego. Os protagonistas desta fantástica iniciativa son os membros do club de lectura As catro esquinas do quinto do IES Xesús Ferro Couselo (Ourense). Un traballo, primeiro de tradución e logo de lectura dramatizada e locución, que lembra outras valiosas iniciativas escolares.
Aquí vos deixo, para gozardes delas, a versión orixinal de Burton (con subtítulos en inglés) e logo a feita na nosa lingua.
Por que unhas letras do Scrabble foxen do seu taboleiro? Están cansas de ser como as demais? Buscan algo?...
Que pelaso!!! Si, señor, despois da súa peripecia fóra taboleiro, grazas aos produtos para tinxir o cabelo, as letras K, E, R e T conseguiron ese aire ben colorido e moderno.
O popular xogo do Scrabble xa protagonizou outros anuncios en entradas anteriores. Nesta ocasión, o xogo de mesa serve de base para un comercial brasileiro dos cosméticos KERT. Un anuncio cheo de imaxinación e sentido do humor feito polos deseñadores de Movafilmes coa técnica do stop motion.
Outro exemplo máis da efectividade publicitaria dos xogos coas letras e coas palabras.
Pat e Mat son dous veciños chapuzas que decote se deben enfrontar a todo tipo de problemas domésticos. Na súa teimosía nunca desisten ata atopar unha solución, sempre de forma creativa: proxectan, reparan, recompoñen e constrúen ata crear os artefactos máis inverosímiles (que recordan ás máquinas de Rube Goldberg). E o caso é que Pat e Mat son tan teimudos e imaxinativos como torpes. Para o noso sorriso, o único que conseguen despois de tantos esforzos é, como non, xerar novos problemas.
Deseguido veremos todo o que chegan a argallar para poder dedicarse a unha das súas grandes paixóns: resolver encrucillados.
Hai que ver a onde nos pode levar o gusto polos xogos de palabras!
En fin, Pat e Mat foi unha serie televisiva de humor creada coa técnica de stop motion por Lubomir Benesz. Unha entrañable mostra da mellor animación da Europa do leste naqueles arredados tempos da Guerra Fría. Desde os años 70 e sen necesidade de palabras, estes personaxes fixeron gozar as familias da súa orixinaria Checoslovaquia e ao pouco o seu éxito foi espallándose por todo o mundo. Aquí deixo unha ligazón onde podedes atopar outros capítulos desta fantástica serie.
Unha silueta humana loita contra un ambiente violento, composto exclusivamente por texto escrito. Esa persoa anónima non pode evitar os ataques e debe engulir as palabras para recuperar, ao cabo, a harmonía. Unha fermosa animación que nos fala da experiencia de ter dislexia, do desafío de aprender desde a diferenza e da grandeza de superalo.
A peza, titulada Words (2009), foi creada polo realizador estadounidense Max Strebel e resultou premiada en diversos certames de curtametraxes. Máis de 800 imaxes pintadas, unha a unha, sobre texto de libros e que logo se enlazaron mediante a técnica do stop motion. De prestardes un chisco de atención á súa banda sonora, da compositora Dosia McKay, decatarédesvos que só interveñen nela dous instrumentos: un piano e... unha máquina de escribir.
En fin, outra animación máxica para nosa colección. Dádelle de novo ao play e a gozar!
Hai que ver que cousas feitiñas se conseguen coa técnica do stop motion. Grazas á xente de Remexernalingua coñecín este magnífico vídeo educativo portugués elaborado por un grupo de mestres/as de 2º Ciclo de Ensino Básico (a nosa Educación Primaria). O seu obxectivo é transmitir, de forma simple e divertida, o concepto de fonema (un contido aparentemente árido para os cativos).
Un vídeo que pode resultar moi rendible tamén para os nosos rapaces pois, ademais de lles axudar a comprender sen dificultades eses contidos máis «técnicos», tamén os achega aos feitos da diversidade lingüística e da familiaridade entre o galego e o portugués.
Bótanse en falta máis ferramentas audiovisuais en galego que traten estes contidos. Pola rede atopei estoutro vídeo do valiosísimo microespazo «Ben falado», dirixido e presentado polo académico Xesús Ferro Ruibal. Nel faise unha amena presentación das sete vogais da nosa lingua.
E volvemos á técnica da animación stop motion. Agora coa curtametraxe TXT ISLAND (2009): unha aventura de ton épico que acaba por se converter nunha ocorrente crítica do consumismo e do progreso insustentable. Unha burbulla de luxo e luces de neon que finalmente fai... bluf! Que familiar resulta!
O seu autor, o deseñador gráfico británico Chris Gavin, confesa na súa propia web que todo xurdiu cando, seis anos antes de crear o filme, comprou nunha tenda de segunda man unha caixa coas letras de plástico e o taboleiro que lles serve de base. Comezou a xogar e a formar figuras ata descubrir que podía crear simbolicamente grandes escenas que doutro xeito serían inviables por custo ou por tempo. Por exemplo: un «O» (o maiúsculo) e un par de «x» (xes minúsculos) podían converterse nun helicóptero Chinook en pleno voo. E este foi o xerme desta orixinal animación que nos amosa o alfabeto completo a invadir unha illa paradisíaca.
Segundo comenta Gavin, levoulle uns nove meses rematar esta pequena obra mestra (que contou co seu propio trailer). Con ela demostrou que para narrar grandes historias non son necesarios moitos medios, basta con boas doses de creatividade e ganas. Iso si, desde que vin o vídeo por primeira vez, non podo evitar sentir certa inquedanza cando vexo varios «i» agrupados...
Anthony Nold é un mozo estadounidense cun gran talento para a ilustración. Nesta web podes atopar brillantes mostras do seu traballo e, de todas elas, a que máis me fascina é a que vemos deseguido. Unha semente que xermola e medra ata se converter nun orixinal xogo de agudeza visual. O propio Nold presenta o reto ao comezo da animación: «Intenta descubir todas as palabras ocultas no debuxo». Ánimo e a exercitar a agudeza visual.
Que? Como foi a pescuda? Epic, awesome, notorious, freedom, stupid, hate... e moitas outras. E para rematar, unha lúcida cita do autor sobre o poder das palabras: Words aren´t just a bunch of letters. They are quite powerfull. Be sure to choose the ones you use carefully («As palabras non son só unha morea de letras. Elas son moi poderosas. Asegúrate de escoller as que usas con coidado»).
O vídeo anterior está elaborado, como outros de Anthony Nold, mediante stop motion, unha vella técnica de animación que logra crear ilusión de movemento mediante fotografías sucesivas de obxectos estáticos lixeiramente modificados.
Moitas escenas animadas que circulan pola rede están realizadas deste xeito, tan laborioso como efectivo. Velaquí outra mostra das posibilidades desta técnica cun fermoso vídeo do obradoiro de stop motion da aula de Plástica do IES As Barxas (Moaña) e tamén un titorial sobre como foi o proceso de creación.
