02/02/2016

O menor «slam» do mundo



Os poetry slams, ou batallas de poesía falada, están de moda (1, 2, 3, 4...). O que me engaiolou do slam que encabeza a entrada, celebrado en São Paulo hai un par de anos, foi a busca da condensación extrema, con tres modalidades na mesma noite: o MENOR SLAM DO MUNDO (poemas de ata 10 segundos), o MINIMENOR SLAM DO MUNDO (poemas de ata 3 segundos) e o NANOSLAM DO MUNDO (poemas de 1 segundo).

As regras básicas dos poetry slams son:
1) Un poema (ou texto) por vez, debendo ser de autoría do/a poeta (poden ser lidos).
2) Sen accesorios, sen disfraces, sen acompañamento musical.
3) Os poemas deben axustarse ao límite de tempo.
4) Un xurado formado por varias persoas (5 ou 7), sorteadas entre o público, debe valorar as actuacións tendo en conta a forma e o contido, a expresividade e a inspiracion poética.
5) Os membros do xurado conceden candansúa nota despois dos poemas. A nota máis alta e a máis baixa non se teñen en conta.
Despois das roldas estipuladas, só un dos participantes é proclamado gañador ou gañadora. Os poetry slams convértense así na modalidade lúdico-deportiva da poesía falada. 


Ningún comentario:

Related Posts Plugin for WordPress, Blogger...